وفاقی وزیر داخلہ محسن نقوی نے کہا ہے کہ کالجز اور یونیورسٹیز کے طلبا کیلئے لائسنس کا اجرا کر رہے ہیں۔اسلام آباد میں میڈیا سے گفتگو کرتے ہوئے محسن نقوی کا کہنا تھا کہ کالجز اور سکولوں کے بچوں کو ہمارے پاس آنے کی ضرورت نہیں ہوگی، ہم تمام کالجز، یونیورسٹیز کے اساتذہ سے رابطہ کر کے مہینے میں ایک یا دو بار جا کر ان کے لرنر اور ڈرائیونگ لائسنسز بنائیں گے۔انہوں نے کہا کہ 70 سال سے زائد عمر کے لوگوں کو ان کے گھر میں جا کر یہ سہولت فراہم کریں گے، یہ عوام کا حق ہے۔وفاقی وزیر کا کہنا تھا کہ ہمیں ٹریفک کا مسئلہ حل کر کے اسے سگنل فری کرنا ہے، اگلے آنیوالے دنوں میں آپ کو کافی چیزیں دیکھنے کو ملیں گی، ہم اسلام آباد کو منشیات اور تجاوزات سے پاک کریں گے۔انہوں نے مزید کہا کہ میں صبح لاہور پاسپورٹ آفس گیا تھا، وہاں بہت کرپشن کی شکایت تھی، میں وہاں کے اعلیٰ عہدیداران کو بدل کر آیا ہوں، پاسپورٹ کے اجرا میں تاخیر ہو رہی ہے، اسے صحیح کرنے میں تھوڑا سا وقت لگے گا، کچھ تکنیکی مسائل ہیں پر اب یہ نہیں ہوگا کہ لوگ پیسے دیں لیکن پاسپورٹ نا بنے۔محسن نقوی کا کہنا تھا کہ پارکنگ کی سہولت فراہم نہ کرنے والی عمارتوں کے خلاف کارروائی کریں گے۔
