• زینب قتل کیس: پولیس نے ملزم کو انسداد دہشت گردی کی عدالت میں پیش کردیا

    لاہور: پولیس نے زینب قتل کیس کے ملزم عمران کو انسداد دہشت گردی کی عدالت میں پیش کردیا۔ پنجاب کے ضلع قصور سے اغواء کی جانے والی 7 سالہ بچی زینب کو زیادتی کے بعد قتل کردیا گیا تھا جس کی لاش 9 جنوری کو ایک کچرا کنڈی سے ملی تھی۔ پولیس نے 14 روز کی تگ و دو کے بعد گزشتہ روز ملزم عمران کو گرفتار کیا جو قصور میں دیگر 8 بچیوں کے قتل میں بھی ملوث ہے۔ ڈی این اے ٹیسٹ کی مدد سے زینب کا قاتل گرفتار جیونیوز کے مطابق ملزم عمران کو پولیس نے انسداد دہشت گردی کی خصوصی عدالت میں پیش کیا جہاں اے ٹی سی کے جج شیخ سجاد کی عدالت نمبر ایک میں پیش کیا گیا ہے۔ پولیس ملزم سے کی گئی تفتیش سے متعلق رپورٹ عدالت میں پیش کرے گی۔ ملزم نے کئی حربے آزمائے: آر پی او قصور جیو نیوز کے پروگرام ’جیو پاکستان‘ میں گفتگو کرتے ہوئے ترجمان پنجاب حکومت ملک احمد خان نے کہا کہ ملزم کے یخلاف مقدمہ تیزی سے چلایا جائے گا۔ جب کہ پروگرام آج شاہ زیب خانزادہ کے ساتھ میں گفتگو کرتے ہوئے آر پی او قصورذوالفقار حمید نے بتایا کہ قانون کی گرفت سے بچنے کےلیے زینب کے قتل کے ملزم نے کئی حربے آزمائے، پولیس نے پکڑا تو پہلے دل کے دورے کا ڈرامہ رچایا، پولیس نے ملزم کو ڈی این اے لے کرچھوڑ دیا لیکن اس پر کڑی نظر رکھی، پھر ملزم نے داڑھی منڈوا دی اور کئی دن گھر سے غائب رہا۔ زینب کے محلے داروں کا کہنا ہے کہ ملزم پر شک کیسے کرتے وہ خود لوگوں کے ساتھ مل کر زینب کے قاتل کو ڈھونڈ رہا تھا۔ گزشتہ روز ملزم کی گرفتاری کے بعد پریس کانفرنس میں شہبازشریف کا کہنا تھا کہ ملزم کو جلد سے جلد سزا کے لیے کیس ہنگامی بنیادوں پر چلنا چاہیے۔ ’ملزم نے زینب سے کہا امی ابو سے ملوانے لے جارہا ہوں‘ شہبازشریف کے بیان پر چیف جسٹس لاہور ہائیکورٹ نے گزشتہ رات ایک تقریب کے دوران کہا تھا کہ شہبازشریف کو یقین دلاتے ہیں کہ کیس کی روزانہ کی بنیاد پر سماعت ہوگی۔

  • اسحاق ڈار کی درخواست پر ہجویری ٹرسٹ کے اکاؤنٹس بحال

    احتساب عدالت نے اسحاق ڈار کی درخواست پر ہجویری ٹرسٹ کے اکاؤنٹس بحال کر دیئے۔ عدالت کا کہنا ہے اکاؤنٹ کی رقم فلاہی منصوبوں پر خرچ کی جاسکتی ہے۔ احتساب عدالت کے جج محمد بشیر نے محفوظ فیصلہ سنایا۔ احتساب عدالت کے جج محمد بشیر نے اسحاق ڈار کی درخواستوں پر سماعت کی۔ اسحاق ڈار کے وکیل نے دلائل دیتے ہوئے کہا کہ ہجویری ٹرسٹ یتیموں کا ادارہ ہے جہاں 93 بچے زیرکفالت ہیں، کیس بننے سے اکاؤنٹس غیر فعال ہوگئے، ہجویری فاؤنڈیشن ایک سے زیادہ منصوبے چلا رہا ہے۔ انہوں نے کہا مختلف اسپتالوں کو ڈیلائسز کیلئے 5 سے 6 کروڑ روپے دیئے جاتے ہیں، ہجویری فاؤنڈیشن ہی ٹرسٹ کو فنڈز دیتا ہے، دونوں اکاؤنٹس بحال کئے جائیں، تین سال کے اخراجات کی دستاویزات جمع کرا دی ہیں۔ پراسیکیوٹر نیب عمران شفیق نے کہا کہ یہ درست ہے ہجویری ٹرسٹ میں یتیم بچے زیر کفالت ہیں مگر یہ بھی حقیقت ہے کہ فلاحی ادارے کا غلط استعمال کیا گیا، نہیں چاہتے کہ یتیم بچوں کی کفالت رکے۔ عدالت نے سماعت 31 جنوری تک ملتوی کر دی۔

  • انٹراپارٹی الیکشن کیس: پی ٹی آئی نے ریکارڈ جمع کرانے کیلئے مزید وقت مانگ لیا

    پاکستان تحریک انصاف نے انٹراپارٹی انتخابات کیس میں الیکشن کمیشن سے انتخابات کا ریکارڈ جمع کرانے کے لیے مزید وقت مانگ لیا۔ الیکشن کمیشن میں تحریک انصاف انٹراپارٹی انتخابات سے متعلق کیس کی سماعت چیف جسٹس کی سربراہی میں پانچ رکنی کمیشن نے کی۔ تحریک انصاف انٹراپارٹی انتخابات کی مانگی گئی تفصیلات فراہم نہ کر سکی۔ تحریک انصاف کے چیف الیکشن کمشنر اعظم سواتی نے کمیشن کو بتایا کہ ہمارے پاس انٹراپارٹی انتخابات کی تفصیلات موجود ہیں تاہم جمع کرانے کے لیے وقت درکار ہے، انکا کہنا تھا کہ ہمارے انٹرا پارٹی انتخابات میں کچھ بھی غیر قانونی نہیں، ممبرز کی تعداد لاکھوں میں ہے اس لیے ریکارڈ بہت طویل ہے، جس پر چیف الیکشن کمشنر نے استفسار کیا کہ آپ نے انٹراپارٹی انتخابات کے نتائج کیسے مرتب کیئے؟، پی ٹی آئی کو انٹراپارٹی انتخابات کا ریکارڈ کم از کم ایک سال رکھنا چاہیئے تھا۔ وکیل درخواست گزار کی جانب سے کہا گیا کہ تحریک انصاف تاخیری حربے استعمال کر رہی ہے جس پر الیکشن کمیشن کے پنجاب کے رکن کا کہنا تھا کہ درخواستگزار کو کیس مضبوط بنانے کے لیے بتانا چاہیئے کہ دھاندلی کہاں ہوئی، کمیشن نے کیس کی سماعت 8 فروری تک ملتوی کر دی۔

  • اورکزئی ایجنسی‘گھر پر ڈرون حملہ،حقانی گروپ کے کمانڈر سمیت 2 افراد ہلاک

    ہنگو:اور کزئی اور کرم ایجنسی کے سرحدی علاقہ سپن ٹل میں ڈرون حملے سے دو افراد ہلا ک ہوگئے۔ذرائع کے مطابق اورکزئی کے سرحدی علاقے سپن ٹل کے ایک گھر پر امریکی ڈورن حملے سے دو افراد ہلاک ہوگئے۔ ڈرون حملے میں حقانی گروپ کے کمانڈراحسان عر ف نورے کے گھر پر دو میزائل داغے گئے جس سے کمانڈر احسان عرف نورے سمیت دو افراد ہلاک ہوگئے ہیں۔

  • امریکا کا دباؤ پہلے قبول کیا نہ اب کریں گے، خواجہ آصف

    سوئٹزر لینڈ: سوئٹزر لینڈ میں میڈیا سے گفتگو میں خواجہ آصف کا کہنا تھا کہ بھارتی وزیراعظم کو جہاں موقع ملتا ہے وہ پاکستان دشمنی کا مظاہرہ کرتے ہیں جس کا انہیں بھرپور جواب دیا جاتا ہے۔ امریکا سے متعلق سوال پر وزیر خارجہ نے کہا کہ پاکستان نے اپنی ایٹمی پالیسی امریکا سے پوچھ کر نہیں بنانی اور نہ ہی اُن سے پوچھ کر ترمیم کرنی ہے۔ مخالفین پر تنقیدی وار کرتے ہوئے کہتے ہیں جن جماعتوں کو 2018 کے انتخابات میں شکست نظر آ رہی ہے۔ وہ گو مگو کی صورتحال پیدا کر رہی ہیں لیکن ملک میں سینیٹ اور عام انتخابات وقت پر ہوں گے۔ وزیر خارجہ ڈیوس میں ہونے والی عالمی اقتصادی فورم میں شرکت کرینگے۔

  • چیف جسٹس پاکستان نے خواتین سے متعلق حالیہ بیان پر معذرت کر لی

    اسلام آباد: چیف جسٹس پاکستان ثاقب نثار نے خواتین سے متعلق حالیہ بیان پر کھلی عدالت میں معذرت کر لی۔ ذرائع کے مطابق چیف جسٹس ثاقب نثار نے کھلی عدالت میں معذرت کرتے ہوئے کہا کہ مجھے اپنے کمنٹس پر افسوس ہے، ایک تقریب میں چرچل کی تقریر کو کوٹ کیا تھا،میں عورتوں کی عزت کرتا ہوں ، میں نے کسی جنس کے لیے بات نہیں کی تھی۔ چیف جسٹس کا مزید کہنا تھا کہ کسی کے جذبات مجروح ہوئے ہوں تو ان کو درست کرنا چاہوں گا،میرے لئے کوئی انا کا مسئلہ نہیں اس لئے میرے بیان سے کسی عورت کو دکھ ہوا ہو تو معذرت کرتا ہوں۔یاد رہے کہ رواں ماہ کراچی میں جوڈیشل کانفرنس کے دوران چیف جسٹس نے اپنے خطاب میں سابق برطانوی وزیراعظم ونسٹن چرچل سے منسوب ایک مشہور قول کا حوالہ دیتے ہوئے کہا تھا کہ انھیں ہمیشہ یہ بتایا گیا ہے کہ تقریر خاتون کے سکرٹ کی طرح ہونی چاہیے جو نہ اتنی لمبی ہو کہ دلچپسی ہی نہ رہے اور نہ اتنی مختصر کہ مقصد ہی سمجھ میں نہ آئے۔ چیف جسٹس کے اس بیان پر ویمنز ایکشن فورم کراچی کی طرف سے چیف جسٹس ثاقب نثار کے نام لکھے گئے ایک کھلے خط میں ان سے معذرت کرنے کے ساتھ ساتھ یہ مطالبہ بھی کیا گیا ہے کہ چیف جسٹس قانونی شعبے اور عدلیہ میں خواتین کے خلاف روز بروز بڑھتے ہوئے صنفی امتیاز اور ان شعبوں میں خواتین کی نمائندگی ضرورت سے کم ہونے کو بھی تسلیم کریں اور اس پیشے سے وابستہ خواتین کے لیے ہراس سے پاک ماحول فراہم کرنے کے لیے فوری اقدام کریں۔